தன் வலிமையும், செயலின் வலிமையும் தெரிந்து செயல்படும் தன்மையே தன்னம்பிக்கையான செயலாக வெளிப்பட்டு வெற்றிபெறும்’.
ஒரு செயலின் தன்மையை அறிந்து, அதில் உள்ள சவால்களையும், விளைவுகளையும் கையாளும் திறமையே தன்னம்பிக்கை ஆகும். மேலும், எதிர்பாராமல் வரும் சூழ்நிலைகளை எதிர்கொள்ளும் தைரியத்தையும், மனவுறுதியையும் தன்னம்பிக்கையினால்தான் பெறமுடியும்.
தன்னம்பிக்கை எப்போதும் நிகழ்காலத்தில் செயல்பட்டு, இன்றைய செயலின் விளைவுகளையும், எதிர்காலத்தின் மாற்றங்களையும் கருத்தில் கொண்டு செயல்பட வைக்கும் தன்மை உடையது. சமவாய்ப்பு உள்ளவர்களுடன் உழைப்பதற்கான ஊக்கம் தரக்கூடியது. எதிர்ப்புகளை எதிர்கொண்டு, மனஉறுதியுடன் செயலாற்றும் சக்தி தரக்கூடியது.
விளைவுகள்:
வாழ்க்கையின் பல்வேறு நிலைகளுக்கு ஏற்றபடி மனிதன் தன்னை வளர்த்துக்கொள்ள தன்னம்பிக்கை மிக அவசியம். சில சமயங்களில் சந்திக்கும் பின்னடைவுக்கும், தோல்விக்கும், பொறுப்பேற்று அதை சரி செய்து வெற்றிக்கு வழி காணவும், தன்னுடைய தவறுகளை (ஈகோ இல்லாமல்) உணர்ந்து சரி செய்யும் தன்மையும் தன்னம்பிக்கையினால்தான் விளைகிறது.
“பெரியோரை வியத்தலும் இலமே,
சிறியோரை இகழ்தல் அதனினும் இலமே”.
என்று புறநானூற்று புலவர், கணியன் பூங்குன்றனார் பாடியது போல யாரையும் தனிப்பட்ட அளவில் புகழ்வதோ, இகழ்வதோ இல்லாமல் அவர்களின் சிந்தனைகளை, செயல்களை ஆராய்ந்து எதை செய்ய வேண்டும் எதை செய்யக் கூடாது என்று தெளிவு பெற ஒவ்வொரு மனிதருக்கும் மனதில் தன்னம்பிக்கை நிச்சயம் வேண்டும்.
தன்னம்பிக்கை என்பது செயல் சார்ந்த நேர்மறையான குணம் என்பதால், இது செயலைச் சிறப்பாகச் செய்ய தேவைப்படும் முக்கியமான குணமாகும்.
பணியுமாம் என்றும் பெருமை சிறுமை
அணியுமாம் தன்னை வியந்து.
பெருமைப்படக்கூடிய சாதனைகள் செய்தவர்கள் என்றும் பணிவுடன் நடந்துகொள்வார்கள். ஆனால், தங்களைப் பற்றிய பெருமையான பேச்சு அவர்களின் செயலைவிட மிகப்பெரிதாக இருக்கும் நிலையில் அது பெருமையாகாது என்று உலகப்பொதுமறைக் கூறுகிறது.
வாழ்க்கையில் கிடைத்த வெற்றிகள் அனைத்தும் தன்னுடைய வியூகத்தால் மட்டுமே கிடைத்ததாகப் பெருமை பேசுவதும், தவறுகளோ, தோல்விகளோ ஏற்பட்டால் அதற்கு மற்றவர்களைக் காரணமாக்குவதும் தற்பெருமையின் அடிப்படை குணங்களாகும்.
தற்பெருமை பேசுவதற்கு ஏற்றபடி நிகழ்வுகளைக் கூறுவதும், மற்றவர்களின் பெருமையைக் குறைத்துப் பேசுவதும் தற்பெருமையின் வெளிப்பாடுகளாகும்.
தற்பெருமைக்கு, இயல்பாகவே பணிவு இருக்காது என்பதால் புதிய கருத்துகளை அறிந்துகொள்ளவோ, மாற்றங்களை ஏற்றுக்கொள்ளவோ ஆர்வம் இருக்காது. ‘உங்களை மாதிரி… வேறயாரும் இல்லீங்க’ என்று முகஸ்துதி கூறி, புகழ்பாடுபவர்களை மட்டும் தன்னோடு சேர்த்துக் கொண்டு, அவர்கள் கூறுவதை உண்மையென உறுதியாக நம்பி பெருமை கொள்ளும் தன்மை கொண்டது.
தாழ்வு மனப்பான்மையின் வலியில் உருவாகும் தற்பெருமை, மனதில் சோர்வை ஏற்படுத்தி எரிச்சலாக வெளிப்படுகிறது. பின்னர், வழிநடத்தும் பொறுமையோ, விளைவுகளுக்குப் பொறுப்பேற்கும் தன்மையோ இல்லாமல் எல்லாவற்றிலும் குறைகளைக்கண்டு, மட்டம் தட்டியே தன்னை உயர்த்திக் கொள்ளும் தற்பெருமை இயலாமையாக மாறுகிறது.
ஒருவன் தன்னை மிகவும் அடக்கமானவன் என்று கூறும்போதே அவனுடைய அடக்கம் மறைந்து விடும் என்று சான்றோர்கள் எச்சரித்துள்ளனர்.
எனவே, ஒருவருடைய சிறப்பை அவருடைய செயல்பாடுகளே நிச்சயம் வெளிப்படுத்தும் என்பதால் எப்போதும் தன்னை வியந்து தானே பெருமை பேசுவது தேவையற்றது மட்டுமல்ல மற்றவர்களின் பாராட்டைப் பெறுவதற்காகச் செய்யும் போலித்தனமான செயல்களால் உள்ள மதிப்பும் குறைந்து விடும்.
மேலும், தன்னை உயர்ந்தவனாகக் காட்டிக்கொள்ளும் அலட்டல் மற்றவர்களுக்கு வெறுப்பையும், சலிப்பையும் ஏற்படுத்தி விடும்.
தன்னை நினைந்து வியப்பவனை விரைந்து கெடுக்க அவனுடைய தற்பெருமை எண்ணமே போதும் என்று வள்ளுவர் கூறியுள்ளார்.
உலகில் குறையில்லாத மனிதர் என யாரும் இல்லை என்று பெரியவர்கள் கூறுவார்கள். மனிதர்கள் இயல்பில் பல்வேறு இயலாமைகளோடு இருக்கலாம். ஆனால் தற்பெருமை கொண்டவர்களுக்குத் தங்கள் (தற்பெருமை பேசும்) இயலாமையே இயல்பாகி விடுகிறது.
வாழ்வியல்:
உலக நடைமுறையில் தன்னிலை விளக்கமாகச் சில சமயங்களில் பேசவேண்டியது இருக்கிறது. அந்த நிலையில் தன்னம்பிகையான வெளிப்பாடுகளையே மற்றவர்களும் விரும்புவார்கள்.
அரிய செயல்கள் செய்திருந்தால், அவை செயல்சார்ந்த விளக்கமாக, கேட்பவரின் குறிப்பறிந்து பயனுள்ள வகையில் வெளிப்படுத்தினால், அதுவே அனைவருக்கும் நல்ல உணர்வையும் ஊக்கத்தையும் தருகின்ற அணுகுமுறையாகும்.
ஒருவர், தான் சொல்வதை வெல்லும் சொல் வேறொன்று இல்லாத வகையில் தேர்ந்தெடுத்து, தன்னுடைய செயலின் சிறப்பை வெளிப்படுத்துவதே நாகரிகமானதாகும்.
மேலும், மற்றவர்கள் புகழ்கின்ற நிலையில், அது அச்செயலின் வெற்றிக்கு கிடைக்கும் பாராட்டு என்பதை உணர்ந்து, பாராட்டுபவர்களின் மேன்மை உணர்ந்து மகிழ்ச்சியைப் பண்போடு வெளிப்படுத்துவது உயர்ந்த பண்பின் செயலாகும்.
இதுவே, பதவி வரும்போதும் பணிவுடன் இருந்து, நேர்மையாகச் செயல்படும் துணிவையும் தரும். தன்னம்பிக்கை, தற்பெருமை என்ற இந்த இரு வேறுபட்ட குணங்களும் மனிதர்களிடம் இருப்பவைதான் என்றாலும், இவைகளுக்குள் இருக்கும் வேறுபாடுகளே மனிதர்களின் மனநிலையையும், குணத்தையும் தீர்மானிக்கின்றன.
எனவே, தானும் உயர்ந்து மற்றவர்களையும் மதித்து, மனநிறைவுடன் வாழ்வதற்கு உதவும் பண்புகளே தன்னம்பிக்கையின் பக்கபலமாக இருக்கும் என்ற சிந்தனையைப் பகிர்ந்து கொள்ளவே இந்தப் பதிவு.
# நன்றி.
